Ministri për Shoqëri Informatike dhe Administratë, Jeton Shaqiri përmes një postimi në rrjetet sociale ka bërë njoftimin në lidhje me harmonizimin e ligjeve vendase nga sfera e mediave me Direktivën Europiane për shërbimet e mediave audiovizive 2018/1808. Në periudhën në vijim Ministria e Shoqërisë Informatike dhe administratës do të punojë për harmonizimin e Ligjeve vendase nga sfera e mediave me Direktivën Europiane për shërbimet e mediave audiovizive 2018/1808. Në kuadër të angazhimeve që rrjedhin nga Marrëveshja e Stabilizim Asociimit, harmonizimi i legjislacionit të fushës audiovizive me “acquis communitaire” është detyrim për Republikën e Maqedonisë së Veriut si shtet kandidat për anëtarësim në BE. Në këto kushte, prioriteti i ardhshëm do të jetë transpozimi i ndryshimeve të miratuara në legjislacionin e brendshëm kombëtar me qëllim përafrimin e legjislacionit të brendshëm me acquis të BE-së. Ndryshimet në Direktivën e re të Bashkimit Evropian përfshijnë, ndër të tjera, disa rregullime të reja që synojnë mbrojtje më të mirë të të miturve; ndryshime në rregullat e komunikimeve me natyrë tregtare, rregulla të reja për platformat online, promovimin e veprave evropiane, rregulla më të mira për mbrotjen e qytetarëve nga nxitja e urrejtjes si dhe kompetencat e trupave rregullatorë. Me qëllim të një procesi sa më profesional, përfaqësues të MSHIA-së gjatë muajve të fundit kanë marrë pjesë në trajnime dhe konferenca, ku nga ana ekspertëve të jashtëm është prezantuar Direktiva e re e BE-së e cila duhet të transponohet në legjislacionin vendas.
