Sot në tryezën e rrumbullakët me temë “Kthimi i trurit në vendlindje”, organizuar nga Universiteti “Nënë Tereza” theksova se “Ikja e trurit” është shndërruar në refren të trishtuar në Ballkanin Perëndimor, ku shumë të rinj vlerësojnë ëndrrat e tyre për të jetuar dhe punuar jashtë vendit. Them që përtej kësaj, ky është një fenomen global, por kur prek vendet e vogla që janë ende në zhvillim, pasojat janë më të dukshme dhe më të ndjeshme në të gjitha segmentet e jetës shoqërore.
Në fokusin e MASH-it është krijimi i reformave për parandalimin e “ikjes së trurit” thash se duhet të flasim më shpesh për arsyet e qëndrimit në vendlindje, si dhe të flasim për mënyrat e kthimit të kuadrove me përvojë, me qëllim që të krijohet një klimë më pozitive dhe më shpresëdhënëse për brezat e ardhshëm.
Më duhet të them se fokusi i Ministrisë së Arsimit dhe Shkencës është krijimi i proceseve reformuese me një qasje serioze ndaj këtij fenomeni, sepse duke ndërtuar një sistem arsimor cilësor dhe premtues, duke mbështetur talentet dhe masat për harmonizimin e drejtimeve dhe arsimit për nevojat e tregut kontribuojmë në krijimin e kushteve dhe standardeve më të mira të jetesës këtu në vendin tone.
