Ministri i Ekonomisë Kreshnik Bekteshi, sot realizoi takim pune me përfaqësues të Asociacionit të Hotelierve të Maqedonisë së Veriut (HOTAM).
Temë kryesore e bisedës në takim ishin masat dhe mundësitë për mbështetje që i ndërmerr Ministria e Ekonomisë dhe Qeveria për përmirësimin e kushteve në sektorin e turizmit dhe gastronomisë.
Ministri Bekteshi tha se këtë vit kemi sezon të suksesshëm turistik dhe pritshmëritë janë që ky trend të vazhdojë edhe në dy muajt e ardhshëm.
“Këtë vit kemi pasur sezon të suksesshëm turistik, sidomos në rajonin e Ohrit dhe Strugës, dhe këtë e tregojnë të dhënat e publikuara nga Enti Shtetëror i Statistikave, ku ka një rritje mbi 40% të numrit të turistëve të huaj në gjashtë muajt e parë të këtij viti, e në përputhje me të gjitha të dhënat që morëm sot nga gastronomët, ky trend i rritjes së turistëve do të vazhdojë edhe në dy muajt e ardhshëm”, tha ministri i Ekonomisë, Kreshnik Bekteshi pas takimit me përfaqësuesit e HOTAM-it.
Ministri Bekteshi tha se tashmë kanë filluar aktivitetet në fushën e krijimit të masave për mbështetjen e sektorit turistiko-gastronomik në fushën e përmirësimit të kushteve për punë të gastronomëve dhe turistëve.
“Dhe pikërisht në këtë drejtim Ministria e Ekonomisë dhe Qeveria kanë filluar të zhvillojnë programe të reja me synimin për të ndihmuar gastronominë dhe shtetin në përmirësimin e kushteve, të cilat do të nxisin rritjen e numrit të turistëve që do të ishin më të kënaqur me qëndrimin e tyre dhe do të qëndronin më gjatë në vendin tonë. Këtë po mendojmë ta bëjmë përmes Ligjit për mbështetjen financiare të investimeve, ku një nga mundësitë është përfshirja e sektorit të gastronomisë dhe hotelierisë në formën e granteve të drejtpërdrejta për investime shtesë për përmirësimin e kushteve”, tha ministri duke shtuar se si mundësi është duke u shqyrtuar edhe ndryshimi i Rregullores ekzistuese për subvencionimin e turistëve.
“Po ashtu mënyrë e mbështetjes do të ishte edhe përmes ndryshimit dhe plotësimit të Rregullores ekzistuese për subvencionimin, ku një pjesë e mjeteve që ndahen nga institucionet të orientohen drejtpërdrejt në hotele dhe me ato mjete të realizohen investime të reja”, tha Bekteshi.
