Ministri i Punëve të Jashtme, Bujar Osmani, ka takuar sot Sekretarin për Marrëdhëniet me Selinë e Shenjtë, Kryepeshkopin Paul Richard Gallagher, i cili ndodhet për vizitë në vendin tonë.
U shpreh kënaqësi e ndërsjellë për zhvillimin e suksesshëm të marrëdhënieve bilaterale mes dy vendeve, bazuar në lidhje të rëndësishme historike, vlera të përbashkëta kulturore dhe shpirtërore.
“Dua të theksoj faktin se mes Vatikanit dhe Shkupit po zhvillohen marrëdhënie të ngushta, miqësore dhe të sinqerta. Ato bazohen në lidhjen tonë tradicionale, të mishëruar në Gonxhe Bojaxhiun, lindur këtu në Shkup, Nënë Terezën tonë, e cila me humanizmin dhe mëshirën e saj është rrënjosur thellë si shenjtore në sistemin e vlerave katolike romake. Pastaj, vijnë te apostujt e shenjtë Kirili dhe Metodi, të cilët janë edhe shtylla modelit kulturor të Evropës dhe një urë e fortë që lidhë Maqedoninë e Veriut dhe Vatikanin”, tha Osmani.
Duke falënderuar për kryepeshkopin Gallager për pjesëmarrjen në Forumin e Prespës për Dialog, Ministri Osmani e informoi homologun e tij për kushtet dhe sfidat e fundit në procesin e integrimit të Maqedonisë së Veriut në Bashkimin Evropian.
“Mendoj se patëm një diskutim të frytshëm, me tema vërtet të rëndësishme, veçanërisht fakti që dominoi në të gjithë Forumin se Ballkani Perëndimor pa mëdyshje i përket Bashkimit Evropian dhe Maqedonia e Veriut mori mbështetjen praktikisht nga të gjithë pjesëmarrësit në hapjen e negociatave me Bashkimin gjatë presidencës franceze”, tha Osmani.
Kryepeshkopi Gallager rikonfirmoi mbështetjen e Selisë së Shenjtë në rrugën tonë drejt Bashkimit Evropian, duke besuar fuqishëm se me integrimin e vendit në familjen evropiane do të përfitojë jo vetëm rajoni, por i gjithë kontinenti.
