Ministri i Punëve të Jashtme i Maqedonisë së Veriut, Bujar Osmani, së bashku me Ministrin e Punëve të Jashtme të Afrikës së Jugut, Naledi Pandor, nënshkruan komunikatë të përbashkët për vendosjen e marrëdhënieve diplomatike ndërmjet dy vendeve, në kuadër të seancës së 78-të të Asamblesë së Përgjithshme të Kombeve të Bashkuara në Nju Jork.
“Vendosja e marrëdhënieve diplomatike ndërmjet Maqedonisë së Veriut dhe Afrikës së Jugut i konfirmon zotimet tona për të ndërtuar marrëdhënie miqësore dhe partneritete me vendet gjeografikisht të largëta. Hapja e një kapitulli të ri në marrëdhëniet dypalëshe mes dy vendeve ofron mundësi shtesë për zhvillimin e lidhjeve ekonomike dhe të biznesit, si dhe për forcimin e bashkëpunimit në nivel shumëpalësh”, theksoi Osmani.
Akti i zyrtarizimit të miqësisë ndërmjet Maqedonisë së Veriut dhe Afrikës së Jugut paraqet bazë të mirë për zhvillimin e bashkëpunimit në një sërë fushash si kultura, turizmi, shëndetësia, si dhe për ndërtimin e kornizës kontraktuale.
Afrika e Jugut është vendi i 182-të me të cilin Maqedonia e Veriut ka vendosur marrëdhënie diplomatike.
