Tetovë, 28 maj 2025
Kryetari i Bashkimit Demokratik për Integrim, Ali Ahmeti, mirëpriti në takim Ambasadorin e Republikës së Çekisë në Shkup, Jaroslav Ludva.
Gjatë takimit u diskutua për zhvillimet aktuale politike në vend dhe për procesin e integrimit evropian të Republikës së Maqedonisë së Veriut, të cilin kryetari Ahmeti e vlerësoi si prioritet absolut për BDI-në dhe për shqiptarët.
Ai theksoi se integrimi në Bashkimin Evropian nuk duhet të mbetet një kauzë e njëanshme, por të shndërrohet në prioritet të përbashkët të të gjithë faktorëve politikë dhe institucionalë në vend.
Në këtë kontekst, kryetari Ahmeti nënvizoi domosdoshmërinë e zbatimit të reformave të thella, përfshirë vetingun e politikanëve, gjykatësve dhe prokurorëve nën mbikëqyrje ndërkombëtare, verifikimin e pasurisë dhe pronës së zyrtarëve publikë, si dhe hetimin e procesit të privatizimit dhe pasojave që kanë buruar prej tij.
Sipas tij, këto janë hapa të domosdoshëm për ndërtimin e një shteti me drejtësi të paanshme, sundim të ligjit dhe institucione që u shërbejnë qytetarëve dhe jo interesave të ngushta politike.
Kryetari Ahmeti ritheksoi se integrimi evropian nuk ka alternativë dhe se ai mbetet rruga e vetme drejt stabilitetit, zhvillimit ekonomik, demokracisë funksionale dhe barazisë së plotë për të gjithë qytetarët.
