Kryetari Ali Ahmeti përkujton me respekt 2 Korrikun 1990, ditën kur deputetët shqiptarë të Kuvendit të Kosovës ndërmorën një hap historik, duke shpallur Kosovën njësi të barabartë dhe të pavarur.
Ai vlerëson se Deklarata e 2 Korrikut përbën një nga aktet më të rëndësishme politike e juridike në historinë moderne të Kosovës, sepse vendosi themelet për miratimin e Kushtetutës së Kaçanikut më 7 shtator 1990 dhe hapi rrugën e procesit institucional drejt lirisë, pavarësisë dhe shtetndërtimit.
Sipas tij, Deklarata e 2 Korrikut mbetet simbol i guximit politik, i vizionit kombëtar dhe i vendosmërisë së popullit të Kosovës për të jetuar i lirë dhe i barabartë.
Me respekt e mirënjohje, kryetari Ahmeti kujton sot të gjithë ata që kontribuan në këtë kapitull të madh të historisë sonë kombëtare.
