Kryetari i Bashkimit Demokratik për Integrim, Ali Ahmeti, mori pjesë në ceremoninë e lamtumirës së Nënës Fatime Xhemaili, duke e vlerësuar atë si simbol të dashurisë, sakrificës dhe heroizmit për atdheun. Me këtë rast, kryetari Ahmeti theksoi se Nëna Fatime ishte një grua e fortë dhe e vendosur, e cila gjatë gjithë jetës së saj dha shembull të lartë atdhedashurie, dinjiteti dhe përkushtimi ndaj kauzës kombëtare.
Ai vlerësoi se ajo u la pasardhësve të saj – Bajrushit, Mustafës, Emrushit, Qamilit, Mufailit, Nazifjes dhe Lumnijes – trashëgiminë më të çmuar: dashurinë për atdheun, qëndresën dhe besimin e palëkundur në drejtësinë e luftës për liri dhe pavarësi. Kryetari Ahmeti theksoi se kjo trashëgimi përbën një përgjegjësi të madhe për të gjithë, që kujtimi dhe vepra e saj të nderohen gjithmonë dhe të vazhdohet rruga e sakrificës dhe përkushtimit që ajo mishëroi me dinjitet.
I lehtë qoftë dheu i Kosovës për Nënën Fatime Xhemaili. Qoftë i përjetshëm kujtimi për të dhe e nderuar përgjithmonë vepra e saj.
