Tetovë, 17 dhjetor 2025
Kryetari i Bashkimit Demokratik për Integrim, Ali Ahmeti, mori pjesë në ceremoninë solemne të organizuar me rastin e 31-vjetorit të themelimit të Universitetit të Tetovës, ku ish-Presidentit të Republikës së Shqipërisë, Prof. Dr. Rexhep Meidani, iu nda titulli “Doctor Honoris Causa”.
Kryetari Ahmeti vlerësoi se ky titull i lartë akademik përbën një mirënjohje të merituar për kontributin e çmuar të Prof. Dr. Meidanit në zhvillimin e dijes, demokracisë dhe bashkëpunimit mbarëshqiptar, si dhe për mbështetjen e tij të vazhdueshme ndaj arsimit dhe institucioneve akademike.
Ai theksoi se Universiteti i Tetovës mbetet një shtyllë e rëndësishme e emancipimit intelektual dhe kombëtar, ndërsa figura të tilla si Akademik Rexhep Meidani përfaqësojnë frymëzim dhe model për brezat e sotëm dhe të ardhshëm.
Në këtë përvjetor të rëndësishëm, u riafirmua roli i Universitetit të Tetovës si një nga institucionet më të rëndësishme të arsimit të lartë shqiptar dhe faktor i rëndësishëm në zhvillimin akademik, shkencor dhe shoqëror.
