Kryetari i Bashkimit Demokratik për Integrim, Ali Ahmeti, zhvilloi një takim me përfaqësuesin e posaçëm të Norvegjisë për Ballkanin Perëndimor, Eirik Nestås Mathisen, dhe ish-Ministrin e Mbrojtjes së Republikës së Kosovës, Armend Mehaj.
Gjatë takimit, bashkëbiseduesit shkëmbyen mendime dhe qëndrime mbi zhvillimet aktuale në rajon, proceset euroatlantike dhe sfidat e përbashkëta me të cilat përballet Ballkani Perëndimor.
Kryetari Ahmeti theksoi rëndësinë e zbatimit të plotë të Marrëveshjes së Ohrit, ruajtjes së barazisë dhe përfaqësimit të drejtë në institucione, si parakushte themelore për paqen, stabilitetin dhe zhvillimin afatgjatë të vendit.
Ai vlerësoi mbështetjen e vazhdueshme të Norvegjisë për rajonin dhe rolin e saj konstruktiv në promovimin e dialogut, bashkëpunimit dhe reformave demokratike.
Kryetari Ahmeti shprehu mirënjohje për interesimin dhe angazhimin e Norvegjisë në Ballkanin Perëndimor, duke theksuar se në kohë sfidash, miqtë e vërtetë dhe partnerët e besueshëm janë më të rëndësishëm se kurrë.
