Shkup, 12 shkurt 2025
Kryetari i Bashkimit Demokratik për Integrim, Ali Ahmeti, zhvilloi një takim me z. Anzhej Frangeš, të dërguarin e posaçëm të Republikës së Sllovenisë për Ballkanin Perëndimor, ku riafirmuan marrëdhëniet e shkëlqyera ndërmjet dy vendeve. Gjatë takimit u theksua rëndësia e bashkëpunimit të vazhdueshëm ndërmjet Republikës së Maqedonisë së Veriut dhe Republikës së Sllovenisë, veçanërisht në procesin e integrimit evropian dhe në mbështetjen e reformave që avancojnë të drejtat, barazinë dhe marrëdhëniet ndëretnike në vend.
Kryetari Ahmeti nënvizoi se Marrëveshja e Ohrit mbetet gurthemeli i paqes, stabilitetit dhe bashkëjetesës në Republikën e Maqedonisë së Veriut, duke e cilësuar atë si një model të suksesshëm për ndërtimin e një shoqërie multietnike, të barabartë dhe gjithëpërfshirëse. Bashkëbiseduesit diskutuan gjithashtu për sfidat me të cilat përballet vendi në rrugën drejt anëtarësimit në Bashkimin Evropian dhe u pajtuan për rëndësinë e thellimit të bashkëpunimit me partnerët dhe aleatët strategjikë, si Republika e Sllovenisë, për të përshpejtuar proceset integruese.
Kryetari Ahmeti vlerësoi mbështetjen e vazhdueshme sllovene për perspektivën evropiane të vendit dhe ritheksoi se bashkëpunimi i ngushtë ndërmjet dy vendeve do të vazhdojë në funksion të ndërtimit të një të ardhmeje më të sigurt, më të drejtë dhe më prosperuese për të gjithë qytetarët.
