Tiranë, 1 tetor 2025
Kryetari i Bashkimit Demokratik për Integrim, Ali Ahmeti, u nderua me titullin “Doctor Honoris Causa” nga Universiteti Europian i Tiranës, në vlerësim të kontributit të tij në avancimin e të drejtave të shqiptarëve, ndërtimin e paqes dhe promovimin e integrimit euroatlantik të Republikës së Maqedonisë së Veriut.
Me këtë rast, kryetari Ahmeti vlerësoi se ky nderim lidhet ngushtë me rrugëtimin e përbashkët dhe sakrificat e të gjithë atyre që kanë kontribuar ndër vite për barazi, dinjitet, paqe dhe përparim.
Ai theksoi se ky vlerësim nuk është vetëm një mirënjohje personale, por një nderim për të gjitha përpjekjet, angazhimet dhe sukseset e përbashkëta në shërbim të çështjes kombëtare dhe të ardhmes evropiane.
Duke shprehur mirënjohjen për këtë vlerësim të lartë akademik, kryetari Ahmeti ritheksoi përkushtimin për të vazhduar punën në funksion të avancimit të të drejtave të shqiptarëve, forcimit të paqes dhe realizimit të aspiratave euroatlantike të vendit.
