Tetovë, 13 shkurt 2026
Kryetari i Bashkimit Demokratik për Integrim, Ali Ahmeti, e përgëzon z. Albin Kurti për zgjedhjen në detyrën e Kryeministrit të Republikës së Kosovës.
Kryetari Ahmeti vlerëson se Kosova ka nevojë për një qeverisje që forcon sovranitetin, konsolidon institucionet, nxit zhvillimin ekonomik dhe garanton barazinë para ligjit. Sipas tij, Republika e Kosovës ka nevojë për vendime të menduara mirë dhe për hapa të sigurt që avancojnë stabilitetin, zhvillimin dhe mirëqenien e qytetarëve.
Ai shpreh bindjen se e ardhmja e Kosovës ndërtohet mbi partneritetin e përhershëm me Shtetet e Bashkuara të Amerikës dhe mbi rrugën e pakthyeshme të integrimit në Bashkimi Evropian, si bosht i orientimit të saj strategjik dhe qytetërues.
Me këtë rast, kryetari Ahmeti i uron kryeministrit Kurti mandat të suksesshëm, vendimmarrje me vizion, qëndrueshmëri në veprim dhe lidership që bashkon energjitë e vendit në shërbim të së mirës së përgjithshme dhe të brezave që vijnë.
