Ministri i Punëve të Jashtme, Bujar Osmani, u takua me Ambasadorin e Mbretërisë së Belgjikës, Frederik Meris, me seli në Sofje, ndërsa gjatë ditës kishte takim edhe me Ambasadoren e Republikës së Portugalisë, me seli në Beograd, Marija Virxhinija Mendes Da Silva Pina. Në takime u diskutua për perspektivën evropiane të Maqedonisë së Veriut dhe mundësitë për avancimin e saj në periudhën vijuese, duke pasur parasysh Samitet e BE-së në qershor.Në takim me Pinjan, u shqyrtuan angazhimet dhe përpjekjet e ndërmarra deri më tani të Maqedonisë së Veriut dhe Portugalisë, si kryesuese aktuale me Këshillin e Bashkimit Evropian, në planin e integrimit evropian të shtetit tonë. U theksua se gjatë periudhës së kaluar marrëdhëniet bilaterale u ndërtuan në bazë të marrëdhënieve të ngushta miqësore dhe nivelit solid të bashkëpunimit të ndërsjellë në më shumë fusha. Gjatë bisedës me Ambasadorin Meris u theksua se në periudhën e ardhshme e presim edhe mbështetjen e Mbretërisë së Belgjikës, si një nga vendet themeluese të Bashkimit Evropian, me qëllim të mbajtjes së Konferencës ndërqeveritare dhe të fillimit formal të negociatave aderuese për anëtarësim të plotë në Union. Ndërkaq, marrëdhëniet bilaterale u vlerësuan si të shkëlqyera, të ndërtuara në bazë të interesave të përbashkëta strategjike. Takimet u shfrytëzuan për të shkëmbyer mendime edhe për zhvillimet aktuale rajonale, globale dhe llojet e tjera të bashkëpunimit, veçanërisht në fushën e multilateralizmit.
