Tetovë, 13 shkurt 2026
Kryetari i Bashkimit Demokratik për Integrim, Ali Ahmeti, i përcjell urimet e tij të sinqerta znj. Albulena Haxhiu për zgjedhjen në detyrën e lartë të Kryetares së Kuvendit të Republikës së Kosovës.
Kryetari Ahmeti vlerëson se forca e shtetit buron nga institucione të forta, nga sundimi i ligjit dhe nga njerëzit e përkushtuar që i udhëheqin ato me integritet dhe përgjegjësi. Ai thekson se zgjedhja e znj. Haxhiu në krye të institucionit më të lartë përfaqësues të vendit përbën një përgjegjësi të madhe, por edhe një nder për t’i shërbyer qytetarëve dhe për të ruajtur autoritetin e Kuvendit të Kosovës.
Duke shprehur besimin e tij në të ardhmen e Republikës së Kosovës, kryetari Ahmeti thekson se përparimi i saj lidhet ngushtë me forcimin e institucioneve demokratike, aleancën strategjike me Shtetet e Bashkuara të Amerikës dhe avancimin e integrimit në Bashkimin Evropian.
Me këtë rast, kryetari Ahmeti i uron znj. Haxhiu punë të mbarë, vendimmarrje të drejtë dhe lidership që forcon demokracinë, unitetin institucional dhe perspektivën euroatlantike të Kosovës dhe të rajonit.
