Prishtinë, 17 dhjetor 2024
Kryetari i Bashkimit Demokratik për Integrim, Ali Ahmeti, zhvilloi takime në Prishtinë me Ramush Haradinajn, Memli Krasniqin dhe Lumir Abdixhikun, me të cilët diskutoi për zhvillimet në Kosovë, rajon dhe për të ardhmen e përbashkët euroatlantike.
Gjatë bashkëbisedimeve, u theksua rëndësia e forcimit të bashkëpunimit politik dhe institucional, si dhe nevoja për ruajtjen e stabilitetit dhe avancimin e proceseve integruese në rajon.
Kryetari Ahmeti vlerësoi se Kosova ka nevojë për miq dhe aleatë të fuqishëm, ndërsa theksoi se njohja reciproke mbetet zgjidhja e vetme për normalizimin e marrëdhënieve, e cila mund të arrihet përmes politikave progresive, dialogut dhe përkushtimit ndaj së ardhmes.
Ai ritheksoi se mbështetja e tij për Kosovën dhe për rrugëtimin e saj euroatlantik do të jetë gjithmonë e palëkundur.
Kryetari Ahmeti shprehu mirënjohje për mikpritjen vëllazërore dhe për bashkëpunimin e vazhdueshëm në shërbim të interesave të përbashkëta kombëtare dhe rajonale.
