Me rastin e 1 Qershorit – Ditës Ndërkombëtare të Fëmijëve, Kryetari i Bashkimit Demokratik për Integrim, Ali Ahmeti, uroi të gjithë fëmijët, duke theksuar rëndësinë e kujdesit, dashurisë dhe përkushtimit ndaj brezave të rinj.
Ai vlerësoi se çdo fillim qershori bota ndalet për një çast për t’iu kushtuar vëmendjen e merituar më të vegjëlve, ndërsa buzëqeshja dhe gëzimi i fëmijëve na rikujtojnë rëndësinë e fëmijërisë, lojës dhe dashurisë së pakushtëzuar.
Ahmeti theksoi se kjo ditë shërben si një thirrje për të gjithë që të mbrojnë dhe promovojnë të drejtat e fëmijëve, duke siguruar që çdo fëmijë të ketë dashuri, arsimim cilësor, siguri dhe mundësi për të luajtur, mësuar e për t’u rritur i lumtur.
Ai uroi që çdo fëmijë të gëzojë një fëmijëri të lumtur, të sigurt dhe plot mundësi për të ndërtuar të ardhmen që meriton.
