Shkup, 24 nëntor 2025
Kryetari i Bashkimit Demokratik për Integrim, Ali Ahmeti, mori pjesë në pritjen e organizuar nga Ambasadori i Republikës së Shqipërisë në Republikën e Maqedonisë së Veriut, Sh.T.Z. Denion Meidani, me rastin e 28 dhe 29 Nëntorit – Ditës së Pavarësisë dhe Ditës së Çlirimit të Shqipërisë.
Me këtë rast, kryetari Ahmeti vlerësoi se këto data të rëndësishme kombëtare na rikujtojnë sakrificën, përkushtimin dhe vizionin e brezave që i dhanë identitet, dinjitet dhe drejtim rrugëtimit tonë kombëtar.
Në një atmosferë respekti, bashkimi dhe krenarie shqiptare, u nderuan vlerat dhe momentet historike që kanë shënuar historinë e kombit shqiptar.
Kryetari Ahmeti uroi të gjithë shqiptarët për këto ditë të rëndësishme, duke theksuar se uniteti, solidariteti dhe përkushtimi ndaj vlerave kombëtare duhet të mbeten udhërrëfyes i përhershëm për të ardhmen tonë të përbashkët.
Urime 28 dhe 29 Nëntori!
