Tiranë, 17 tetor 2025
Kryetari i Bashkimit Demokratik për Integrim, Ali Ahmeti, gjatë qëndrimit në Tiranë në kuadër të pjesëmarrjes në protestën gjithëkombëtare “Liria ka emër – Drejtësi për Çlirimtarët”, zhvilloi një takim vëllazëror me Kryetarin e Kuvendit të Republikës së Shqipërisë, Niko Peleshi, dhe Sekretarin e Përgjithshëm të Partisë Socialiste, Blendi Klosi.
Në fokus të takimit ishin zhvillimet aktuale politike në rajon, proceset euroatlantike dhe domosdoshmëria e bashkërendimit të veprimeve ndërmjet Shqipërisë dhe Maqedonisë së Veriut në rrugëtimin e përbashkët drejt Bashkimit Evropian.
Kryetari Ahmeti theksoi se Shqipëria tashmë ndodhet në një fazë të avancuar të negociatave me Bashkimin Evropian dhe se është jetike që edhe Republika e Maqedonisë së Veriut të ecë përkrah saj, me përkushtim të plotë dhe respektim të standardeve demokratike dhe evropiane.
Ai nënvizoi se rruga drejt Brukselit është një projekt strategjik i përbashkët, që forcon paqen, zhvillimin, bashkëpunimin rajonal dhe garanton perspektivën evropiane të vendeve tona.
